Anxo Araújo pecha a primeira semana de solpores do mes de agosto.

Os Solpores da Rebullón estrean agosto cunha semana na que ofrecerán tres citas culturais, promovendo a música en directo, artistas locais e o encontro comunitario.
Anxo Araújo presenta o seu EP "Viva a costa alentexana".

Mos, 7 de agosto de 2025.-

O ciclo cultural Os Solpores da Rebullón continua a estrea do mes de agosto cunha semana chea de música e bo ambiente sobre o escenario exterior do CSCD As Pedriñas (Tameiga, Mos). Nunha semana na que conquistaron o escenario Three Soul e Quique Gómez & Curro Serrano, continuamos a pola derradeira cita semanal coa música ao vivo nun entorno natural e familiar.

Anxo Araújo ven de estrear o videoclip 'A Costa Alentexana', que anuncia o seu novo dobre sinxelo dentro do EP 'Viva a Costa Alentexana', que saíu á luz o pasado 11 de abril. Non vos perdades este xoves 7 de agosto ás 21h un concerto cheo de sensibilidade, que procura asilo nos ritmos de baile e na súa elegante voz.

Con esta iniciativa, Os Solpores da Rebullón comezan agosto consolidándose como unha cita imprescindible do verán na comarca, apostando pola cultura de proximidade, a música en directo e os encontros comunitarios.

ANXO ARAÚJO

O novo traballo do artista continúa apostando por un pop de ritmos latinos como xa o facía no seu último disco ‘Aprender a bailar’, dando continuidade á luz que emanaba da órbita de aqueles ‘Días felices’. Os sintetizadores, os ventos e os ritmos latinos seguen estando presentes nun traballo que aposta pola viveza e pola elegancia dun orixinal pop de autor en galego.

‘A costa alentexana’ e ‘Viva!’ son os dous sinxelos que forman parte deste novo traballo mesturado por Anxo Araújo con mastering de Vitor García Ultramarinos (A Costa brava/Barcelona). Un traballo atlántico que anuncia o verán e as noites estreladas, como cando fomos, amor, á costa alentexana e aquel aire con restos de sal ergueu as persianas. "Unha celebración da vida, pero tamén dos fracasos e das aprendizaxes, que viva cada día que miramos adiante porque atrás xa non presta mirar" dí Araújo no segundo corte do EP. Anxo Araújo firma un traballo cheo de sensibilidade que procura asilo nos ritmos de baile e na súa elegante voz.

Este verán poderemos velo no 17º Ribeira Sacra como parte da programación do festival o 19 de xullo, compartindo cartel artistas como Julieta Venegas, Angel Stanich ou The Jayhawks. O
primeiro concerto será o 27 de abril no Picnic Sesions, o festival de Saiáns, en Vigo. Tamén estará o 24 de maio na Pousada en Boiro ou o 7 de agosto nos Solpores da Rebullón en Tameiga, Mos, entre outras citas.

A Sala Rebullón
Xestionada pola Comunidade de Montes de Tameiga, a Sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Este ano volveu a alzarse co Premio Martín Códax da Música 2025 á mellor sala de concertos, segundo a votación dos socios e socias de Músicas ao Vivo, recoñecemento que xa ganara no 2023.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.