A Rebullón celebra o Día da Música coa actuación de Terreiras

A Rebullón celebra o Día da Música coa actuación de Terreiras

O concerto do grupo liderado pola cubana Diana Darín terá lugar este sábado 23, ás 22 horas, con billeteira inversa
Terreiras fusiona os ritmos ancestrais e as harmonías vocais para evocar os cantos tradicionais de África, Cuba, Brasil e Galicia

Mos, 20 de novembro de 2024.- A Comunidade de Montes de Tameiga, xestora da Rebullón, propón un concerto moi especial para celebrar o Día Internacional da Música: o regreso á sala de Terreiras.

A actuación deste trío de piano, baixo e percusión comezará ás 22 horas deste sábado, 23 de novembro. E para que todos e todas poidan festexar un día adicado aos músicos e ás persoas amantes da música, o concerto de Terreiras será con billeteira inversa, é dicir, acceso de balde e pago á saída da cantidade que o público considere polo espectáculo que presenciou.

Terreiras regresa á Rebullón tralo seu exitoso paso pola sala no mes de febreiro. Unha vez máis, o grupo liderado por Diana Darín ofrecerá ao público unha fermosa combinación de ritmos ancestrais e harmonías vocais sobre unha base rítmica sólida, formada por piano, contrabaixo e percusión.

Xunto a Yudit Almeida e Lucía Cortiñas, Terreiras misturan e evolucionan as raíces musicais latinas que compartimos a ambos lados do océano, con voces penetrantes que fan viaxar aos espectadores polo tempo e o espacio, evocando os cantos tradicionais de África, Cuba, Brasil e Galicia.

Este sábado, Terreiras porá ritmo e voz ao Día da Música na Rebullón, en Tameiga. Un día para celebrar o poder da música xuntas: público, sala e artistas.

As Terreiras

A sala Rebullón
Xestionada pola Comunidade de Montes de Tameiga, a sala Rebullón converteuse en só seis anos nunha referencia para os espectáculos escénicos e musicais en Galicia. Vén de alzarse co Premio Martín Códax da Música 2023 á mellor sala de concertos, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 persoas que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de costo. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os costes de producción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.