Collón de Lola: un tributo ás cancións do Xabarín para pechar o ano de festa

•A banda, coa súa formación clásica por primeira vez en dez anos, actuará este sábado 27, ás 21:30 horas, desde só dez euros

• Será unha noite con moitas sorpresas, invitad@s de excepción e cunha exposición previa ao concerto sobre a historia do Xabarín Club

Mos, 23 de decembro de 2025.- O Xabarín Club, o mítico programa infantil da Galega, marcou a toda unha xeración, tanto pola súa programación como por unhas cancións que quedaron na memoria colectiva dos galegos e galegas.

Este sábado, a Sala Rebullón rende homenaxe ao programa e aos seus sons, cun concerto tributo a cargo de Collón de Lola –que ademais desembarcan en Mos coa súa formación clásica, por primeira vez desde hai dez anos– este sábado 27, ás 21:30 horas, con entradas desde 10 euros en anticipada á venda online ou quince na billeteira.

Será unha noite do máis divertida e emotiva. O sábado, Collón de Lola celebra o seu 15º aniversario e ten preparadas moitas sorpresas e convidad@s moi especiais o público da Rebullón. A modo de exemplo, toda unha declaración de intencións para comezar a festa: as cen primeiras persoas que merquen a súa entrada recibirán un sandwich de nocilla na porta.

Xunto ao concerto, antes do seu comezo, as persoas asistentes poderán visitar unha exposición sobre a historia do Xabarín Club. Unha xornada irrepetible que vaise mover entre a nostalxia, a festa rachada e as melodías que fixeron época, unha noite para gozar e facer gozar á xente da música en directo e en galego, aproveitando o gran patrimonio musical herdado do Xabarín.

Lonxe de intentar deixalo todo atrás e mirar cara adiante, Collón de Lola (vídeos) decidiu hai anos embarcarse na procura dese limbo onde o bocata de nocilla, o rock n roll e as series de televisión en galego son os protagonistas; aqueles tempos nos que soamente tiñas que preocuparte de a qué nivel de superguerreiro chegaría Songoku ou se Crilín conseguiría ao fin reunir a valentía dabondo para meterlle ficha a c18.

Os compoñentes de Collón de Lola son xente con influencias musicais moi diversas (rock, death metal, rossover, funky, punk, thrash metal, Leticia Sabater...) pero que teñen en com unha única relixión: o Xabarín Club.

Dende o ano 2011, a COLLOADA leva o seu espectáculo por toda a xeografía galega e non van parar. Na Rebullón presentarán o mellor do seu repertorio de máis de 30 cancións, entre as que se atopan temas que van dende “Estou na lavadora” ata cancións de series de debuxos animados como Bola de Dragón.

A Sala Rebullón
Xestionada pola Comunidade de Montes de Tameiga, a Sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Desde entón, alzouse con dous premios Martín Códax da Música á mellor sala de concertos, no 2023 e no 2025, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.