O sábado, emmy Curl + hydn
Ao día seguinte, sábado de talento feminino galego portugués na Rebullón. O sábado 29, ás 22 horas, dobre concerto a cargo da artista multidisciplinar portuguesa emmy Curl xunto ao pop urbano galego de hydn. Entradas en anticipada desde 8 euros, 10 na billeteira, á venda na cantina do CSCD As Pedriñas ou baixo reserva na dirección reservasrebullon@gmail.com
emmy Curl, de nome real Catarina Miranda, é cantante, artista visual, produtora (unha das primeiras mulleres en facelo en Portugal) e compositora lusa con case que vinte anos de traxectoria. O seu traballo valora o patrimonio cultural portugués, incorporando un lado moderno e un estilo de interpretación propio.
O seu álbum máis recente, “Pastoral” (2024), é unha homenaxe á herdanza cultural e o folclore portugués, traballo incluído en varias listas dos mellores discos do ano. De feito, gañou o Premio José Alfonso, que distingue aos traballos musicais con referencia á cultura, historia, lingua e música popular portuguesa. Ademais, este ano Curl chegou á final do Festival da Canção co seu tema “Rapsódia de paz”, e no 2018 xa quedara no segundo lugar, sendo a artista máis votada polo xurado neste certame.
Curl é representante e intérprete do movemento Solar Punk (imaxina un futuro sostible onde tecnoloxía e natureza coexisten) e, ademais de compoñer e cantar, encárgase da escenografía no escenario e do vestiario, creando unha experiencia completa e inmersiva para o público.
Pola súa banda, hydn alzouse no 2024 co Premio Martín Códax da Música á Mellor artista urbana e defínese a si mesma como “a revolución do pop urbano galego con sabor GenZ”. Intérprete, compositora e produtora, hydn conxuga á perfección o pop urbano co house, comezando a experimentar con sons da tradición galega.
En só tres anos de traxectoria, presentou xa varios singles, editou o EP “BaddeR, wicKed” (2023) e tocou nalgúns dos escenarios máis importantes en Galiza, coma o Festival da Luz, o Festival Revenidas, Surfing de Lérez, Festival Noroeste EG, Atlantic Pride, etc. hydn vai presentar na Rebullón o seu espectáculo enérxico e próximo, no cal conxuga a forza das súas producións coa música en directo, coa moda, e coroándoo coa garra dun espectáculo coreografiado.
