O festón dos premiados Fanfarria Taquikardia, este sábado na Rebullón nun dobre concerto xunto a Feral Booty

O festón dos premiados Fanfarria Taquikardia, este sábado na Rebullón nun dobre concerto xunto a Feral Booty

Premio Martín Códax 2025 na categoría de Músicas do Mundo e Mestizaxe, Fanfarria Taquikardia traerá á Rebullón a súa festa trepidante de percusión, ventos, metais e ata doce músicos sobre o escenario
Actúan este sábado 15 ás 21 horas, desde 10 € en anticipada, xunto a Feral Booty: estilo a cabalo entre o folk, o punk, o country e o rock
E o domingo 16 ás 18h, a estrea como solista de Farfulhas Capivara: melodías de sempre e xoias ocultas, folk para pasalo ben

Mos, 11 de novembro de 2025.- Fanfarria Taquikardia consolidouse como unha das propostas musicais máis festeiras do país, grazas á súa mestura de influencias, melodías, enerxías e estilos, que os levaron a recoller na última edición o Premio Martín Códax na categoría de Músicas do Mundo e Mestizaxe.

Agora, Fanfarria Taquikardia chega á sala Rebullón para presentar o seu repertorio taquicárdico, que vai das melodías balcánicas a coñecidas pezas da música clásica e do cine, pasando pola música tradicional galega e latina, e sempre co espírito necesario para o baile. E chegan cun novo traballo, Movendo Marcos (2025), un espectáculo cheo de variacións sonoras, un aviso a navegantes dos mares festivaleiros, habitantes de torreiros e romarías: a viaxe da Fanfarria Taquikardia non remata e moitos máis van ser os momentos para desfrutar.

O grupo actuará este sábado, 15 de novembro, ás 21 horas, nun dobre concerto xunto a Feral Booty, con entradas desde 10 euros en anticipada, 12 euros na billeteira, á venda na cantina do CSCD As Pedriñas.

Fanfarria Taquikardia é contaxiosa paixón e innegable vitalidade. Os seus enérxicos concertos son unha celebración da vida, inspirando á audiencia a sentir ledicia e euforia. A súa música é cativadora e apaixonante desde a primeira nota ata a última, sen deixar espazo para a indiferenza. En directo, ninguén queda impasible e moito menos inmóbil co brutal espectáculo que ofrece este particular conxunto musical.

A formación principal compóñena unha trompeta, clarinete, saxo alto, saxo tenor, trompa, trombón, tuba, caixa re-adornada, timbais e bombo-pratos, en total, unha ducia de intérpretes sobre o escenario, en moitos casos, procedentes de varios grupos do panorama musical galego. As súas influencias musicais son varias: desde as fanfarras de Europa do Leste e os “brass ensembles” de Nova Orleans ata as charangas carnavalescas caribeñas e brasileiras e a música tradicional galega.

Pola súa banda, Feral Booty vén prolongar a sesión festeira do sábado na Rebullón. O público vai vibrar co seu son potente e un estilo a cabalo entre o folk, o punk, o country e o rock. Un directo cheo de actitude e enerxía, ideal para moverse e deixarse levar pola personalidade das voces e os seus riffs contundentes de guitarra.

O domingo, a estrea de Farfulhas Capivara

A Sala Rebullón volve dar a alternativa a outro artista cunha proposta musical de raíces galegas, neste caso, ao pontevedrés Fernando López, de nome artístico Farfulhas Capivara, que se estrea este domingo na que será a súa primeira actuación en público como solista.

O concerto será o domingo 16 desde as 18 horas, con entrada polo sistema de billeteira inversa. O público poderá gozar con temas folk de toda a vida e algúns non tan coñecidos, onde primarán as melodías que influenciaron a vida musical do artista, cancións dos repertorios de Milladoiro, Treixadura, Brisas da Coruña, Cempés, Iván Costa, etc.

Coma di o propio Farfulhas Capivara, “música de festa foliadeira sen máis pretensión que nalgún momento haxa alguén que decida apartar algunhas das cadeiras e pórse a bailar”.

A Sala Rebullón
Xestionada pola Comunidade de Montes de Tameiga, a Sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Desde entón, alzouse con dous premios Martín Códax da Música á mellor sala de concertos, no 2023 e no 2025, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.