Hugo Guezeta, referencia do rap galego, leva á Rebullón a súa xira “O noso tempo”

• O antigo membro da banda Son da Rúa actúa este sábado 14 ás 22 horas, coa rapeira viguesa Nadie González como artista convidada

• Con entradas dende 12 euros, Hugo GZ continuará a xira nas míticas salas Mardi Gras (A Coruña) e na Sónar (Compostela)

Mos, 12 de decembro de 2024.- Hugo Guezeta inicia este sábado, 14 de decembro, ás 22 horas na sala Rebullón a súa xira “O noso tempo”, título tamén do seu primeiro traballo, que presentará ademais en A Coruña e Santiago de Compostela.

O artista é un dos nomes máis respectados do rap galego. Antigo integrante da recoñecida banda Son da Rúa, Hugo Guezeta é un referente pola súa traxectoria, a versatilidade da súa música e as súas letras reivindicativas. As entradas están xa á venda en anticipada online desde 12 euros máis gastos de xestión.

“O noso tempo” parte da premisa de que estamos sumidos nun soño do que debemos espertar. Chegou a hora. É un berro a unha xeración aletargada, á que apela directamente á través das súas letras; unha chamado á romper cos bloqueos que impiden avanzar á sociedade.

No álbum que vai presentar o sábado na Rebullón, Hugo GZ rodease do mellor da escea galega: Dakidarría, Nadie González, Temible Olivina, Peter Petrowski, Willow GHZ e incluso o regreso, nunha única canción, da súa antiga banda, Son da Rúa. Xunto a eles, propón un rap que xoga con distintos estilos, adaptándose a bases moi diferentes, máis intimista nas súas letras, mais sen perder o foco reivindicativo que lle caracteriza.

Este sábado, na Rebullón, Hugo Guezeta virá acompañado de Nadie González. A viguesa, MC, rapeira e tamén produtora, será a artista convidada de luxo que fará do 14 de decembro unha noite única e irrepetible para todas as persoas amantes do rap que se fai no noso país.

WhatsApp_Image_2024-11-21_at_12.58.45.jpeg

Hugo Guezeta

Este domingo, espectáculo familiar de balde
A fin de semana na sala Rebullón continúa cunha proposta ben diferente. O domingo 15, a partir das 19 horas, Os Jalochos ofrecerán o seu espectáculo de presentación do seu novo conto musical: “A Landra viaxeira e o amigo Lambón”.

Pensado para público de todas as idades, Os Jalochos presentarán un espectáculo musical interactivo co obxectivo de fomentar entre a rapazada o uso da lingua galega como fonte de diversión e aprendizaxe, e cos valores principais do respecto pola natureza, a música e o canto.

Para levar adiante a actuación, as e os artistas desenvolven un concepto participativo ideal para a cativada, mediante xogos baseados en conceptos musicais (tempo, ritmo, dinámica…), así como a percusión corporal, o baile e a lingua de signos.

Os jalochos

A sala Rebullón
Xestionada pola Comunidade de Montes de Tameiga, a sala Rebullón converteuse en só seis anos nunha referencia para os espectáculos escénicos e musicais en Galicia. Vén de alzarse co Premio Martín Códax da Música 2023 á mellor sala de concertos, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 persoas que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de costo. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os costes de producción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.