Luís Peixoto, un dos cordofonistas máis prestixiosos de Portugal, presenta novo traballo na Rebullón

• Despois do éxito do seu último disco “Geodesia”, Luís Peixoto presenta “Nortada”, o seu novo sinxelo xunto co galego Xosé Liz

• Intérprete e compositor, recoñecido polo seu equilibrio entre o tradicional e o contemporáneo, Luís Peixoto actúa este sábado 7 ás 22 horas, desde 12 euros en anticipada

Mos, 3 de febreiro de 2026.- Unha das propostas musicais máis interesantes do país veciño chega á Rebullón. Luís Peixoto atópase entre os mellores intérpretes de cordofóns tradicionais, como o cavaquiño e o bandolim, e está a ser quen de construír unha carreira artística con maiúsculas.

Despois de formar parte varios grupos e acompañar a inmumerables artistas (Dulce Pontes, Kepa Junkera, Uxía Senlle, Rosa Cedrón, Brian Finnegan, Kalakan…), Luís Peixoto (vídeos) lanzou no 2017 a súa traxectoria en solitario cun traballo que foi moi ben acollido por público e crítica: “Assimétrico”.

Pese ao recoñecemento, o artista non quedou estancado na fórmula. Sempre apuntando a novos horizontes musicais, no ano 2021 publicou “Geodesia”, cunha sonoridade actualizada, en formato trío acústico e centrándose principalmente na mandolina. Neste traballo, Peixoto rodeouse do talento do catalán Ciscu Cardona (guitarra) e do asturián Rubén Bada (violín) para reinterpretar, a través de composicións propias, a música tradicional lusa. “Geodesia” foi amplamente eloxiado por publicacións como World Music Central ("soberbio"), NSF ("creativo e virtuoso") e Time Out ("rara beleza e sensibilidade").

Agora, Luís Peixoto dá continuidade á súa procura constante de novos camiños con “Nortada”, un novo sinxelo editado hai pouco máis de mes e medio co galego Xosé Liz. O portugués continúa explorando sonoridades, sempre no perfecto equilibrio entre o contemporáneo e o tradicional.

Este sábado, Peixoto ofrecerá na Rebullón un concerto moi especial en formato cuarteto xunto a Álvaro Iglesias, Xosé Liz e Marc Xarau, e contará ademais con dous convidados de excepción: Fernando Barroso e Pedro Fariñas.

A actuación terá lugar este sábado, 7 de febreiro, ás 22 horas. As entradas están á venda desde 12 euros en anticipada, online e tamén na cantina do CSCD As Pedriñas, ou por quince euros na billeteira. Un encontro único que promete un diálogo musical intenso e emotivo entre distintas sensibilidades e raíces ibéricas.

A Sala Rebullón
Xestionada pola Comunidade de Montes de Tameiga, a Sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Desde entón, alzouse con dous premios Martín Códax da Música á mellor sala de concertos, no 2023 e no 2025, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.