Ivette Cepeda, voz imprescindible da canción cubana, ofrece na Rebullón o seu único concerto en Galicia

• É unha das cantante máis recoñecidas da súa xeración pola súa voz cálida, potente e versátil, con máis de 30 anos de traxectoria de éxito

• Cepeda presenta “Cruzando puentes”, un espectáculo que une as dúas beiras do Atlántico, este domingo 22 ás 18:30 horas, desde 15 €

• E este sábado ás 22 horas, o rock explosivo dos franceses BLOYET BROTHERS fai parada na Rebullón, dentro da súa primeira xira estatal e acompañados polos redondeláns Jay & The Smoking Machines

Mos, 18 de marzo de 2026.- Con trinta anos de traxectoria, Ivette Cepeda gañou con luz propia a súa posición como unha das voces máis importantes de todos os tempos da música cubana. Agora, a artista une as dúas beiras do Atlántico nun espectáculo, “Cruzando puentes”, que presentará este domingo 22 ás 18:30 horas, con entradas desde 15 euros en anticipada (20 na billeteira), á venda online e na cantina do CSCD As Pedriñas.

Ivette Cepeda é unha artista excepcional, unha das voces máis intensas e emocionantes da música cubana contemporánea. Ofrecerá en Mos o seu único concerto en Galicia, un espectáculo co que vén de encher salas en Madrid, Málaga e Valencia, conquistando ao público coa súa forza interpretativa e unha conexión única co escenario.

O seu repertorio bebe do filin, o bolero, a canción latinoamericana e a música de autor, creando concertos profundamente emocionais. A crítica destaca o seu carisma en escena, a intensidade das súas interpretacións e súa capacidade para conectar co público. Tanto é así que se lle considera sucesora emocional de figuras como Santiago Feliú e Compay Segundo.

Leva máis de trinta anos de traxectoria, con varios discos publicados e numerosos recoñececmentos no seu país, como o Gran Premio Cubadisco, o Premio Lucas á mellor canción, Premio Excelencias del Arte, Premio La Bella Cubana da UNEAC e o Premio Coliseo á mellor posta en escena, entre moitos outros. Os premios e a súa gran popularidade no seu país fixo posible xirar con éxito por escenarios de Latinoamérica, Estados Unidos, Francia e Alemaña.

De seguro, na Rebullón ofrecerá un concerto íntimo e poderoso. Ivette Cepeda é unha voz que atravesa a alma e dará un concerto cun nome que tamén é un xesto. “Cruzando puentes” evoca como a música ten esa maxia única de achegar beiras, borrar distancias, tender camiños entre culturas, historias e corazóns. O domingo, desde Cuba ata a Rebullón, chegará unha voz plena de raíces, sentimento e verdade, que converte cada canción nunha ponte viva entre a súa terra e a nosa.

Bloyet Brothers

Este sábado 21, aterra na Rebullón unha proposta musical que non trata de sorprender, pero si de emocionar e facer vibrar. E vaia se o conseguen. Bloyet Brothers son puro rock explosivo que sacan a súa mellor versión no directo e que están a colleitar grandes críticas de medios especializados como Rolling Stone Magazine e emisoras como RTL, que consolidan á banda como unha das propostas más auténticas da escena actual.

Bloyet Brothers están de xira, a súa primeira xira polo Estado con dez paradas (Cáceres, Valladolid, Santander, Madrid…), e chegan á Rebullón co rock&roll dos redondeláns Jay & The Smoking Machines como banda convidada. O concerto, este sábado 21, ás 22 horas, con entradas en anticipada desde 15 euros (18 en billeteira) xa á venda online e na cantina do CSCD As Pedriñas.

Os irmáns Bloyet, un trío bretón composto por Quentin, Vincent e Sylvain, tomaron as rendas de "Rock City" cunha proposta de rock orgánico e familiar que revive a esencia dos anos 70. O grupo combina riffs de fuzz afiados, coros de órgano retro e unha batería percutante para crear un cóctel musical que eles mesmos describen como "orgánico e orgásmico".

Tras o lanzamento do seu EP "Chapter I_ORIGIN" en decembro de 2024, a banda encara 2026 con novidades, incluíndo un novo disco. A súa traxectoria inclúe actuacións destacadas en festivais de renome como Hellfest OFF, Fête du Bruit e Blues sur Seine, onde compartiron escenario con artistas da talla de The Hives, Royal Republic e Ko Ko Mo.

O verdadeiro forte de Bloyet Brothers reside no directo, sendo considerados un grupo de "ao vivo por excelencia" grazas á súa desenvoltura e gran capacidade de improvisación. A súa é unha proposta non só de homenaxe ao rock clásico, senón unha renovación executada con mestría técnica e unha actitude insolente que cativa á audiencia.

A sala Rebullón

Xestionada pola Comunidade de Montes de Tameiga, a sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Desde entón, alzouse con dous premios Martín Códax da Música á mellor sala de concertos, no 2023 e no 2025, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga

A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.