Eris MacKenzie: tradición galega, electrónica e pop, unidos nunha experiencia sensorial

Eris MacKenzie: tradición galega, electrónica e pop, unidos nunha experiencia sensorial

O proxecto en solitario de Carlos Eirís chega á Rebullón este sábado 15, ás 21:30 horas, fusionando electrónica e sons tradicionais.
MacKenzie (que presenta disco) tamén versiona clásicos do pop español, levados ao galego e reinterpretados ao seu particular estilo.
Ademais, o venres 14, a Rebullón acolle o evento do ano no metal en Galicia: o Metalokolypse Fest, con cinco bandas sobre o escenario.

Mos, 12 de marzo de 2025.- Eris MacKenzie (o novo proxecto en solitario de Carlos Eirís) presentará este sábado na Sala Rebullón o seu primeiro traballo, titulado “Meu Ceu, cantigas industriais e brutalismo emocional”. O concerto será o sábado, 15 de marzo, ás 21:30 horas, con entradas desde 10 euros en anticipada, á venda online e na cantina do CSCD As Pedriñas, ou por 14 euros na billeteira.

Será unha actuación moi especial. Ademais de presentar as novas cancións deste interesante proxecto, o artista estará acompañado na Rebullón por amigos músicos como Paula Espada, Serxio Castro, David e Mare, para ofrecer ao público unha proposta cultural que vai máis aló do musical, ata converterse nunha experiencia inmersiva onde son, imaxe e emocións fusiónanse nunha viaxe introspectiva.

A súa particular interpretación da música electrónica dos anos noventa e os sons tradicionais galegos está a recibir o aplauso do público. Eris MacKenzie chega á Rebullón no marco da xira de presentación de “Meu Ceu”, coa que visitou Boiro, Santiago de Compostela e Lugo, e incluso conseguíu esgotar as entradas na Mardi Gras da Coruña, a súa cidade natal.

O seu primeiro sinxelo é “O lavadoiro” (vídeo), un tema que resume á perfección a esencia do proxecto, a sensibilidade da música tradicional que evoluciona á intensidade da electrónica. Ademais, na súa nova andaina musical, MacKenzie tamén destaca por versionar éxitos do pop español, dunha forma moi súa e moi particular, como o “Corazón partío” de Alejandro Sanz ou “Un beso y una flor”, de Nino Bravo, interpretados en galego.

WhatsApp_Image_2025-02-17_at_14.06.43.jpeg

Eris Mackenzie

Metalokolypse Fest

A fin de semana chega moi musical a Tameiga. Este venres 14, a partir das 20 horas, a Rebullón acolle un festival imprescindible para as personas amantes do mellor metal, con cinco bandas e unha combinación salvaxe de estilos: o Metalokolypse Fest.

É a primeira edición deste festival, que nace do amor e da paixón deste territorio polo xénero, e coa pretensión de converterse nunha cita consolidada no país. Para logralo, a organización montou un evento temático baseado na serie “Metalocalypse”, coa idea de ofrecer ao público de Mos e da área de Vigo unha proposta diferente e única, chea de caras coñecidas.

A estrea contará con grupos de distintos xéneros, como Voids Legion (melodeath procedente de Madrid e Vigo, que ademais tocarán un tema da lexendaria banda Dethklok), You Can’t Hide (o mellor neopunk e garage rock, de Vigo), Aquelarre (mítico grupo de powercore, tamén vigués), Indar (chegadas desde Barcelona, o mellor metal progresivo, black e post metal) e Septiembre Negro (outra banda lexendaria do país, con vintecinco anos de traxectoria)

Con este cartel, posiblemente este venres 14 teña lugar na Rebullón o evento metal do ano en Galicia. As entradas xa están á venda, de forma física na cantina do CSCD As Pedriñas, no Bar Princesa o no Bar Revolver, e tamén online, desde só 15 euros en anticipada, ou 20 euros na billeteira.

WhatsApp_Image_2025-02-17_at_11.28.24(1).jpeg

A sala Rebullón
Xestionada pola Comunidade de Montes de Tameiga, a Sala Rebullón converteuse en só seis anos nunha referencia para os espectáculos escénicos e musicais en Galicia. Vén de alzarse co Premio Martín Códax da Música 2023 á mellor sala de concertos, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga

A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 persoas que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de costo. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os costes de producción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.