Fin de semana á galega na Rebullón: o “tradi” de Ailá, o debut de Xiro e o XXV aniversario de Zurrumalla

• Este domingo 14, ás 19 horas, dobre concerto cos consolidados Ailá e Xiro, un novo proxecto asentado na música e baile tradicionais galegos

• E este sábado 13, ás 20 horas, con entrada de balde, unha actuación moi especial polos vintecinco anos de traxectoria musical de Zurrumalla

Mos, 10 de decembro de 2025.- A Sala Rebullón programa unha fin de semana perfecta para gozar da mellor música tradicional galega en directo, con propostas clásicas e contemporáneas e proxectos novos e consolidados.

Este domingo 14, desde as 19 horas, a Rebullón acolle un dobre concerto, Ailá e Xiro, con entradas a 12 euros en prezo único. Con catro discos publicados, Ailá goza dunha traxectoria solvente e premiada. O grupo alzouse co premio Martín Códax da Música 2023 na categoría de Música Tradicional, representou a Galicia no Festival Internacional do Mundo Celta de Ortigueira 2024, no WOMEX 2023 (a maior feira de industrias musicais do mundo), no Festival Interceltique de Lorient 2023 e no Celtic Connections de Glasgow 2020.

“Tradimensional” é o seu último traballo, unha homenaxe á música e ao baile tradicionais, ás vivencias que constrúen identidade e viaxan do pasado ao futuro da man das cantareiras, das mestras pandereteiras, das bailadoras e das e dos tocadores de instrumentos.

Como afirma a banda, “cantamos, tocamos e bailamos as nosas músicas tradicionais para manter viva a alma dun pobo. Deste xeito facemos país: pasado, presente e futuro ondeando a bandeira da súa cultura”. Con este espírito xurde “Tradimensional”: o soño dun país unido nas súas músicas tradicionais. Ailá é un dos representantes máis novos do “tradi”, un xénero que excede ao musical no que a danza e a música pasan a converterse nun xeito de entender a vida.

Xunto a Ailá, o domingo tamén actuará na Rebullón Xiro, un novo e interesante proxecto con raíces nas músicas e bailes tradicionais galegos. O grupo vén de lanzar o seu primeiro EP homónimo, unha viaxe sonora pola nosa música tradicional con cinco paradas, cinco melodías que chegaron ao presente a través da transmisión oral.

O trío santiagués –composto por Icía Kirk, á voz e pandeireta, Andrés Pérez, ao saxo soprano, e Xan Pampín, ao acordeón– fai música de autoría tradicional, mais con arranxos propios elaborados por Xan Pampín. Xiro é o territorio onde conversan as melodías tradicionais, un diálogo coa emoción e a sabiduría que brota da linguaxe da música e do baile tradicional de Galicia, símbolo da nosa identidade como pobo.

XXV aniversario de Zurrumalla

Antes do dobre concerto, Tameiga acolle unha festa de celebración polo vixésimo quinto aniversario de Zurrumalla, cun concerto este sábado ás 20 horas e con entrada de balde na Sala Rebullón, no que haberá moitas sorpresas.

Zurrumalla naceu no 2000. Foi entón cando un grupo de amigos decidiu dar empuxe aos seus anhelos e inquedanzas musicais e, desde o inicio, o grupo foi creando todo un universo ao redor da historia e á tradición musical da terra, un mundo no que sentirse unidos, alegres e orgullosos do noso.

A banda leva a súa paixón ao directo, facendo de cada actuación unha festa. Zurrumalla presenta un estilo musical baseado no tradicional e aproximándose a un folk propio, con composicións e arranxos que encantan ao público. Unha sorpresa de vitalidade e novos aires na nosa música.

A Sala Rebullón
Xestionada pola Comunidade de Montes de Tameiga, a Sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Desde entón, alzouse con dous premios Martín Códax da Música á mellor sala de concertos, no 2023 e no 2025, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.